Saluton al la legantoj de Usona Esperantisto! Mi estas Alena Adler, esperantisto de tri jardekoj, kaj foja Esperanto-instruisto (ĉe NASK kaj enrete). De preskaŭ kvin jaroj, mi tujelsendas esperantlingve ĉiun semajnon per mia plurlingva kanalo, AlenaFenomena ĉe Twitch kaj YouTube. Unu celo de mia plurlingvismo tie estas flegi komunumon ĉe Twitch kaj Discord. Per tio mi diskonigas bonan famon pri esperantaj komunumo kaj kulturo al alilingvanoj. La komunumo daŭre provizas esperantlingvan enhavon por lernantoj kaj lernintoj, kaj engaĝas ilin kun nia kulturo. Dua celo, kiun mi klopodas efektivigi tie, estas kuraĝigi aliulojn kundividi siajn lertojn kun Esperantujo per diversaj medioj.

Aliaj esperantaj faroj miaj inkluzivas tradukadon, muzikumadon, aktoradon (teatran, filman, kaj voĉan) kaj reĝisoradon. Mi instaliĝas kiel nova membro de la teatra fako de la Belarta Konkurso, komisiono de UEA. Estas granda plezuro aniĝi al la redakcio de Usona Esperantisto! Mi antaŭĝojas servi la membrojn de Esperanto-USA.