“Ĉu mi povas helpi vin?”

“Espereble,” la viro diras. Li portas melon-ĉapelon kaj parolas fremdakĉente. “Vi estas la kvina okulisto, kiun mi vizitas. Mi bezonas okulvitron.”

“Mi certe helpos!” la okulisto diras. “Niaj kadroj troviĝas laŭlonge de la muro. Pri kia vi interesiĝas?”

La viro ekrigardas la kadrojn kaj ĝemas. “Ne okulvitrojn,” li diras. “Okulvitron. Mi bezonas monoklon.”

“Malofta peto nuntempe! Homoj bezonantaj korekton unuokule kutime portas okulvitrojn kun nur unu korekta lenso.”

“Tio ne funkcios,” la viro diras.

“Ĉu via dekstra okulo?” la okulisto demandas, ne volante perdi klienton. “Maldekstra?”

“Nek,” la viro diras. Kaj li demetas sian ĉapelon.