La Nord-Okcidenta Regiona Esperanto-Konferenco (NOREK) malfermis sian 44-an jaron je la 22-a de Aŭgusto per bonvena vespermanĝo ĉe Chill N Fill Bar and Food Carts en Portlando, Oregono.

En Portlando, manĝaĵkamionoj estas grava parto de la loka kulturo. Kvankam tia fenomeno ne limiĝas al la urbo, la granda diverseco de kuirartaĵoj disponeblaj en unu loko estas konsiderata kiel karakterizaĵo de la portlanda vivo. Tiaj aranĝoj ebligas al partoprenantoj ĝui diversan elekton de manĝaĵoj, kio aparte taŭgas por grandaj grupoj kun malsamaj preferoj.

Bedaŭrinde, tiu semajnfino montriĝis la plej varma de la jaro en Portlando, kun temperaturoj ĝis preskaŭ 104°F (40°C). Tamen, tio ne malhelpis esperantistojn el la nordokcidento de Usono kaj okcidenta Kanado ĉeesti. Pli ol dudek partoprenantoj kunvenis en la kelo de la Aŭgustana Luterana Preĝejo sabate por aŭskulti prelegojn en Esperanto, partopreni en trezorĉasado kaj interparoli kun samlingvanoj.

Prelegoj pri diversaj temoj estis prezentitaj de John Dale, Ŝeri Wells, Aŭtuno Tafoya, Alejna Warfield, Reĝo Remigio, Nikvo Woods, kaj la prezidanto de Esperanto-USA, Brandono Sowers.

Poste, ni vespermanĝis ĉe McMenamin’s Broadway Pub, ŝatata loka restoracio en Portlando.

Dimanĉe, la lastan tagon de la konferenco, estis planitaj du ekskursoj. La unua devis esti ŝanĝita lastmomente, kiam oni malkovris, ke la Sabata Bazaro (kiu dum la lastaj jaroj okazis kaj sabate kaj dimanĉe) ŝanĝis siajn horojn. Anstataŭe, la partoprenantoj renkontiĝis ĉe la fama portlanda institucio Voodoo Doughnut, konata pro siaj nekutimaj kaj kreemaj benjetoj, ekzemple unu el acerkremo kaj lardo. Poste, ni ĝuis la aĉetitajn benjetojn en Tom McCall Waterfront Park apud la rivero Willamette.

Poste, la grupo vizitis la konatan librejon Powell’s City of Books, kiu okupas tutan urboblokon. Post librofoliumado, la ĉeestantoj ĝisis unu la alian.

Dum tri tagoj preskaŭ tridek esperantistoj de ĉiuj aĝoj kaj lingvoniveloj kunvenis por ĝui la internacian lingvon kaj la komunumon, kiun ĝi nutras. Resume, la konferenco sukcesis daŭrigi preskaŭ kvar-kaj-duonan dekjaran tradicion. Ĝis venontjare!