Dum ni fermas la jaron 2024, ni ĝojas sciigi al vi la progreson, kiun ni faris, kaj niajn planojn por la estonteco. En kvaronjaro kvar (K4) de 2024, ni koncentriĝis pri fortigo de la financa bazo de la organizaĵo, poziciigante nin por transforma jaro 2025. Jen resumo de nia nuna stato:

Financaj elstaraj punktoj

Enspezoj:

En K4, ni ricevis 12 407 $ de enspezoj, ĉefe de membreckotizoj, donacoj, kaj vendoj de nia librejo. Krome, 30 000 $ estis transdonitaj el nia nelimigita investa konto al nia banka konto por certigi, ke niaj operaciaj rezervoj estas en ordo.

Elspezoj:

Ni elspezis 30 596 $ dum la kvaronjaro pri premioj de la Usona Bona Film-Festivalo, stipendioj, kaj gravaj investoj en profesiajn servojn (ekzemple kontadon kaj impostopreparon) kaj salajrojn. Grava paŝo estis nia aliĝo al profesia kontada firmao, kiu helpis nin prepari kaj sendi precizajn financajn raportojn por ke ni povu ĝustatempe sendi nian neprofitcelan federacian impostan deklaron (Formularo 990¹) en la estonteco.

Neta efiko:

Dum K4 montris operacian deficiton de 18 190 $, tio estis kompensita per 41 100 $ da neefektivigita rento, rezultigante netan kreskon de 22 910 $ en aktivoj. Ĉi tiuj gajnoj reflektas nian engaĝiĝon al respondeca administrado de membraj kaj donac-fondusoj.

Fondusoj kaj investoj

Unu el la plej gravaj mejloŝtonoj en ĉi tiu kvaronjaro estis la starigado de dediĉita Fondusa Konto. Ĉi tiu konto, nun apartigita de nelimigitaj investoj, ebligas al ni pli precize spuri fondusojn, kiuj estas donacit-celitaj. Je la 31-a de Decembro, la Fondusa Konto enhavas 277 708 $. En la jaro 2025, ni planas uzi antaŭplanitan retiraĵon de 10% el fondusoj por subteni programajn elspezojn. Ekde 2026, ni planas adopti jaran retiraĵon de 4-5%, kio kongruas kun tutfakaj plej bonaj praktikoj.

Nia nelimigita investa konto staras je 314 208 $ post transdono de 30 000 $ por subteni niajn operaciajn rezervojn. Sed atentu: Ĉi tiuj aktivoj ankoraŭ estas destinitaj por uzado dum longa periodo. Sekve, ni aplikos ankaŭ antaŭplanitan, malgrandan retiraĵon ĉiujare por parte financi la operaciajn kostojn de la Centra Oficejo, inkluzive de la Librejo kaj Usona Esperantisto (UE).

Rigardante antaŭen, ni ĝojas daŭre provizi kaj interretan version al UE kaj profesian, presitan version, uzante nian neprofitcelan rabaton por presado kaj sendado. Por doni iom da kunteksto, la presita versio, sendita al ĉiuj membroj, kostas 4000 $ jare, kio estas 2+% de niaj sumaj elspezoj (kaj eĉ malpli kompare kun nia jara enspezo). La estraro diskutos opciojn por permesi al homoj elekti ne ricevi la paperan version per la nova membro-direktoro aŭ administra sistemo, kiun ni esploras, tamen, pro la tre malgranda efiko sur la buĝeto, ni sentas nin bone pri la valoro, kiun ĝi alportas al niaj membroj.

Dume, la Reed Trust (apartigita ento, kiun ni administras) tenas 405 741 $. Rimarku: Laŭ la jura dokumento kiu starigis la fonduson, ni respondecas direkti 90% de ĝiaj kvaronjaraj enspezoj por subteni Esperanto-edukajn programojn, kaj konservi 10% por kovri niajn kostojn en administrado de la fonduso. En 2025, ni planas dediĉi la tutan 90% al subteno de NASK (la Nord-Amerika Somera Kursaro), semajna enmergiĝa kurso, kiu okazos en Toronto ĝuste antaŭ la Dulanda Kongreso.

Rigardante antaŭen al 2025

Dank’ al la laboro farita de la Centra Oficejo en 2024 por transdoni niajn financajn registrojn al QuickBooks Online, aliĝi al profesia kontada servo, aliĝi al profesia servo por prepari la organizan Formularon 990, ĝisdatigi kaj reorganizi la librejon, kaj efektivigi kvar esencajn financajn kaj konformecajn politikojn, ni eniras la jaron 2025 kun multe da vento en niaj veloj. Nun, post pluraj jaroj, ni ankaŭ kreis ampleksan buĝeton². Vi vidos pli pri tio baldaŭ! Niaj celoj por ĉi tiu jaro inkluzivas:

• Lanĉi monkolektan strategion por diversigi enspezofontojn kaj redukti nian dependecon je fondusoj.
• Plifortigi nian partnerecon kun la Esperantic Studies Foundation.
• Esplori subvenciajn eblecojn por certigi konstantan financadon por gravaj iniciatoj.

Ni certas, ke ĉi tiuj paŝoj ebligos al ni kreski kaj progresigi nian mision dum ni konservas la financan sanon de la organizaĵo.

Dankon pro via daŭra subteno kiel membroj kaj donacantoj. Kune, ni konstruas pli brilan estontecon por Esperanto-edukado kaj aktivado. Se vi havas demandojn aŭ volas pli da detaloj, ne hezitu kontakti min ĉe kasisto@esperanto-usa.org. Ankaŭ, trovu pli oftajn artikolojn kaj ĝisdatigojn ĉe https://www.esperanto-usa.org/finances!