x-metodo akceptata

Usona Esperantisto

Dumonata bulteno de Esperanto-USA

Zamenhofa festo en Fort Worth

Fort Worth, Teksaso – La 10-an de Decembro, 16 homoj kunvenis ĉe la domo de Filipo kaj Elizabeto Dorcas por festi Zamenhoftagon.

teksasanoj Dorothy, Dylan, Noah, Hope, Rhanda, Jarlo, Elizabeto, Filipo, Susan, Fred, Karolino, Steĉo, Timoteo, kaj Ron. (Ne en la foto: Alex kaj Jennifer.)

Alex venis de Hjustono; kaj Timoteo venis de Oklahomurbo, Oklahomo. Ĉiuj kunportis diversajn manĝaĵojn por dividi kun aliaj.

La ĉefa temo de la festo estis amikeco, kaj estis multe da konversacio inter la partoprenantoj. Ni kunvenis je la kvara ptm, kaj ni komencis manĝi je la sesa. Filipo estris la preĝadon, menciante la esperojn de la esperantistaro kaj la fakton, ke la deka de Decembro estas ankaŭ la Internacia Tago de Homaj Rajtoj. Estis interese ke la satiga manĝaĵaro estis vegana pro tio, ke kelkaj el la ĉeestantoj manĝas nek viandon nek glutenon.

La dekoracio de la Dorcas-hejmo estis bele Esperanta. Estis verdaj tablotukoj kun malgrandaj Esperantaj flagoj. Ili ankaŭ havis speciale bakitan sen-glutenan kukon kun Esperanto-flago supre kaj biskvitaj figuretoj de diverslandaj infanoj ĉirkaŭe. [Vidu foton sur la kovrilo. –Red.]

Timoteo parolis pri siaj esperoj pri Esperanto, por Oklahomurbo, kaj por Oklahomo. Ni ĉiuj esperas, ke Esperanto fortiĝu en Oklahomurbo kaj en la regionaj urboj en la ŝtato. Teksasanoj certe volas helpi. Alekso venis de Hjustono, Teksaso. Li diris, ke estas aliaj esperantistoj en la regiono sed ili ne kutimas kunveni. Tio estas pripensinda problemo en urboj kun tiel grandaj areoj kiel Hjustono.

Ni finis la eventon kun kantado kaj pli da diskutado. Rhanda ludis la pianon dum ni kantis. Nature la fina kanto estis la Esperanta Himno.

— Fred Meyer, III
f3meyer ĉe texoma punkto net

Internacia Festivalo en Raleigh, Norda Karolino

Carborro, Norda Karolino – Malgraŭ la fakto ke Raleigh estas nun unu el la koroj de la Esperanto-movado en Usono, la plejparto de la loĝantoj ne scias tion. Unu el la metodoj por havigi la novaĵojn estas trovi indan, multkoloran eventon en la urbo.

Internacia Festivalo Gastigado ĉe budo de la Internacia Festivalo en Raleigh, Norda Karolino.

Nia loka “Internacia Festivalo” havas tridek unu jarojn kaj kutime vizitas ĝin tri mil partoprenantoj. La manĝaĵoj kaj amuzaĵoj estas ĉiam bonegaj. Dum tri tagoj, ses el la membroj de ESTRI (Esperanto Society of the Triangle/Esperanto-Societo de la Triangulo) disdonis cent kvindek broŝurojn, kolektis multajn subskribojn por nia listo de “interesitoj”, kaj kunparolis kun multaj homoj. Ni dekoraciis nian budon per standardo, lernmaterialoj, kaj du ekranoj kiuj montris filmetojn en Esperanto.

Eble estus pli bone se ni havus pli kreemajn ilojn de engaĝado, sed tamen ni trovis tiujn homojn, kiuj havis aŭ tre malgrandan aŭ nenian scion pri Esperanto, kiuj havis malbonan sperton pri Esperanto pasintece, kaj kiuj volas lerni aŭ uzi la lingvon. Se oni estas preta kaj amika al ĉiuj, mi pensas ke oni povas igi ĉiujn tiujn interagojn pozitivaj. Cetere, se oni miksiĝas libere en evento, portante esperantaĵojn, oni renkontos eĉ pli multe da homoj.

Entute ĝi estis bonega evento, kaj ni jam planas fari ĝin denove. Pli da fotoj pri la festivalo troviĝas en nia paĝo en Facebook.

— Abraham Palmer
abraham ĉe boxturtlebakery punkto com