x-metodo akceptata

Usona Esperantisto

Dumonata bulteno de Esperanto-USA

Nia reprezentanto ĉe UEA

Karaj amikoj, mi nomas nian membron Lusi Harmon kiel nian reprezentanton por “komitato-A” de UEA por Esperanto-USA. Ŝi servos tri-jaran deĵoron. Dankon al Lusi pro ŝia konsento daŭri en tiu posteno.

— Filipo Dorcas, Prezidanto, Esperanto-USA

Ĉu traduki pri tervarmiĝo?

Esperantisto en Germanujo antaŭlonge telefonis al mi kaj demandis ĉu iu en Usono tradukis aŭ tradukas la libron An Inconvenient Truth de Al Gore en Esperanton. Li diris ke se ne, li forte rekomendas tian projekton. Ĉu iu en Usono iam aŭdis pri tia traduko?

— Doroteo Holland, dorothyjeanh ĉe gmail punkto com

Instrua interŝanĝo

Mi alkutimiĝis esti ĉe esperantista familio kontraŭ pago por lerni E-on kiam mi studvojaĝis en Eŭropo en 1976. Mi volas nun instrui Esperanton en Saratoga, CA en aŭtuno kaj resti dum unu monato ĉe familio kiu parolas Esperanton kaj povas instrui al mi pri komputiloj.

— Moloud Saghafian, mosagh4 ĉe yahoo punkto com / 14520 Fruitvale Ave, Apt C-304, Saratoga CA, 75075

Instruistoj: informu al E-USA!

Ni multe volas scii, kion vi faras rilate al instruado de Esperanto en Usono.

En nia Norda Teksasa Esperanto-Klubo ni havas multajn entuziasmajn komencantojn. Kelkaj estas infanoj. Ni komencis krei kartludojn. Por divers-aĝaj partoprenantoj ni uzas ankaŭ la kursojn Jen Nia Mondo, Mazi en Gondolando, Pasporto al la Tuta Mondo, kaj ni komencos uzi parton de la Urso Kurso. Ni ankoraŭ esploras pri tio, kio funkcias pli bone. Estas bezono por diversaj paroladoj, studadoj, kaj konversacioj. Ni eĉ havas ŝercan tempon. Kaj la muziko estas ankaŭ tre grava por lerni kaj ĝui Esperanton.

Kion vi faras en viaj klub-kunvenoj kaj/aŭ konversaciaj rondoj? Informu nin, ni petas.

Kompreneble, tiuj el vi kiuj instruas formalajn klasojn multe gravas al ni ĉiuj. Bonvolu informi nin pri tio, kion vi faras. Interesas nin scii, kiujn materialojn vi uzas. Se vi mem kreas studmaterialon, pri kiaj aferoj ĝi temas? Kiuj partoprenas en la klasoj, kaj kiam, kaj kiom ofte la klasoj okazas?

Mi trovis, ke kiam mi babilis persone kun tiuj el vi kiuj instruas formalajn klasojn, vi emas resti tre humilaj pri tio, kion vi faras. La vero estas, ke vi valoras multe. Ni ĉiuj, kiuj partoprenas en la bela lingvo Esperanto, faras grandan servon al la homoj. Do, gratulon al ĉiuj vi! Al ĉiuj ni!

— Elizabeto Dorcas, Komisiito de Edukado, Esperanto-USA, elizabeto ĉe grupoj punkto org / 817.446.4431